Op de boerderij

t Is oavend. Geert en Froukje zitten op de baank in koamer, noast moe. De kinder schoedeln dichter noar moe tou.
“Leest moe ons nog ain verhoaltje veur?” vragt Geert. “Ain mor, den goan we doalek noar boven, Froukje hè?”
Froukje nikt van joa en puult aan moe heur rok.
“Joa, ain verhoaltje,” zegt ze, “en den goan we sloapen.”
“Goud,” zegt moe, “ie joen zin. Nog ain verhoaltje en den op ber, hur.
k Lees joe t verhoal veur van boer Maaier en zien gekke daaier.”
Boer Maaier en boerin Maaier binnen op n mörgen vroug op raais goan en nou mouten de daaier op de boerderij pazen:
“Kukeleku! Kukeleku!” kraait de hoan, dij op t dak van t schuurtje zit. Hai kikt wies om zok tou. t Is de hoogste tied. Tot t nust uut, loilakken! Kukeleku! Uut de veren aalmoal! De zun begunt al te schienen. t Wordt n mooie dag om n bult waark op te knappen. Kukeleku! Vandoag is gainain vrij, want ik bin boas op de boerderij!”
Doar vlogt de schuurdeur open en Blavvo, de grode swaarde hond, stoft noar boeten.
“Woef. Woef!” zegt hai. “Wat is hier aan de haand?”
“Kukeleku!” antwoordt de hoan op t dak. “Tou sloapkop. Kiek nait zo dom en goa mit dien krullen onder de kroan. Ik kin allain mor wakker waarkvolk bruken.”
“Mainst zeker dast doe hier de boas bist. Woef. Woef!” blaft Blavvo.
“Wat dochst doe den?” ropt de hoan. “Doe gaaist die op slag wassen en den gaaist t laand in om de kou te melken!”
“Woef! Woef! Dat heb k van mien leven nog nooit eerder doan,” sputtert de hond tegen.
“Wat heb k ook n hondeleven. Aander honden lopen aal doagen om deur, mor n boerderijhond mout aarbaiden veur de kost.” Blavvo staait op zien achterste poten en blaft nog n moal: “Woef! Den schudt hai zien swaarde kop en slentert noar t laand tou.
“Zolst gain emmer mitnemen?” ropt de hoan hom noa. Blavvo de hond komt weeromsjokken en hoalt n emmer tot t schuurtje uut. “Gaaist melk hoalen in dien schier goud?” vragt de hoan.
“Nee, in dizze emmer!” blaft de hond.
“Gnorr! Gnorr!” Doar komt Knorro t swien aanzetten. d’Oren stoan hom liek omhoog.
“Wat heb k nou aan mien fiets hangen,” zegt hai. “Wat n gebler op de vrouge mörgen.”
De hoan antwoordt: “Hoal de krul mor tot dien steert uut. We hebben gain tied veur meroakels. Der mout vandoag n beetje gebeuren.”
“O, o,” giert Knorro. “k Wor der zenewachteg van.” Knorro draait mor aal in t rond. Hai wordt der hoast doezelg van. 
“Doe gaaist de waske doun,” bestelt de hoan hom. “Doar is niks bie.”
Den komt Viefpoot t schoap der aanlopen.
“Wat hest aal te mekkern doarboven!” ropt ze tegen de hoan op t dak.
“Kom ais van t dak òf ast duurfst. Den zel k die broaden in de vleespaan en opeten.”
“k Blief hier zitten,” zegt de hoan. “Hier kin k joe t beste in de goaten holden.”
“Hest doe t sums veur t zeggen?” vragt Viefpoot.
Zai zegt: “k Luuster allent noar Tok de tuut. Tok is n best daaier, zai zit op d’aaier.”
t Duurt nog even, mor den binnen aal daaier aan t waark. “Maauw! Maauw!” Maupie de kat is aan t schounenpoetsen. “Piep! Piep!” De moezen binnen aan t schovveln.
“Tok! Tok!” De tuten binnen aan t toenhaarken. Aal daaier binnen drok bezeg.
Soavends as t duuster wordt ropt de hoan:
“Kukeleku! Aalmoal sloapen goan! Doalek en op slag!”

“Uut! Uterdepuut.”  Moe klapt t bouk dicht.
“Dat kin nait. Dat kin nait!” ropt Geert. “De hoan zegt allain smörgens kukeleku, as we wakker worden en nait soavends as we op ber mouten.”
“Hest geliek Geert,” zegt moe. “Mörgen goan we de hoan vangen en brengen hom noar de hoanedokter. Want hai is hailmoal in toeze.”
“En boer Maaier en zien vraauw den?” vragt Froukje. “Wenneer komen dij weerom?”
“As Geert en Froukje op ber goan,” zegt moe. “Want den is der weer n dag veurbie. En mörgenvroug mouten Geert en Froukje vris wezen en uutsloapen, as ze weer noar school goan.”
“n Gek verhoaltje moe, hur,” zegt Geert.
Froukje trekt Geert bie de maauw van zien piama van de baank òf. Zai vlogt de trappen op en ropt noar beneden:
“Pak mie den Geert! Pak mie den slome bruier!”
Mor Geert blift beneden stoan. Hai denkt stief noa. Wat n klier van n hoan! Welke boas stuurt zien waarkvolk nou zunder eten op ber?

Auteur: An Kuiper

Inspreker: Ep Krijgsheld