Kastor zien boom

in t midden van ons grasveld
doar ston ons boom dij treurde
en heb ik die wel ais verteld
wat mit ons boom gebeurde?

hai trok zien worrels uut de grond
en dee n stap noar veuren
en ik en kastor – da’s ons hond –
wie zaggen dat gebeuren

de vogels piepden doodsbenaauwd
hol op wie worden schichteg
ons boom dij zee t is goud vertraauwd
ik loop ja hail veurzichteg

ho stop ruip ik dit is dien stee
aans heb wie ja gain schare
mor boom zee kwoad loat mie mit vree!
en ik was in de ware

t wuir moeskestil dou boom bewoog
en over t veld mesjeerde
eerst liekuut deur dou mit n boog
mie stokvergreld negeerde

boom sprong in t daip en voarde dou
noar wildervanksterdale
hai ruip hoera ik bin der nou!
en wupde op de wale

en boom dij treurde zingt aaltied
hai staait doar stoef bie d’brogge
mor kastor is zien boompie kwiet
want boom komt nooit weer trogge

auteur: Gré van der Veen