t Wichie

Der was ais n wichie dat midden in de nacht wakker wuir en aan de haile wereld vruig:
“Bin ik mooi?”
En de haile wereld zee:
“Joa, doe bist mooi.”
Dou ging t wichie hail gerust weer sloapen. En weer wuir dat wichie ais midden in de nacht wakker en ze vruig aan de haile wereld:
“Bin ik laif?”
En de haile wereld zee:
“Nee, doe bist nait laif.”
Dou begunde t wichie te schraiven en ze schraifde tot aan de mörgen tou.

Auteur: Gré van der Veen
Uit: De Siberische Kou (1990)

Inspreker: Geesjen Doddema