Sunterkloas Veurleesverhoalen - Hoofdstuk 12 Op vekaanzie
Pagina afdrukken
Annebeth mag mit pa en moeke n stad oetzuiken doar ze ien veurjoarvekaanzie noar tou gonnen. Londen, Berlien, Praag, Peries, Barcelona.
t Wordt Madrid.
Moeke kikt ien n boukje wat der zo aal te zain is ien Madrid. Pa zocht op t ineternet.
“Is doar ook n daairntoen?” vragt Annebeth.
“Dat denk ik wel”, zegt pa zunder dat e opkikt van t beeldschaarm. “Mor wie huiven nait zuk n haile raais moaken om noar n daairntoen te goan. Dij is hier ook wel”.
Pa en moeke willen wat zain dat muite van t bekieken weerd is.
Je komen din aal gaauw oet op kerken, museums en aandere grote gebaauwen.
Din schut Annebeth ien t zin, dat Sunterkloas ien Madrid woont.
Dat staait aaltied boven t riemke dat bie heur cadeau zit: ‘Madrid, medio november’.
“Sunterkloas woont toch ien Madrid?”
“Zeker”, zeggen pa en moeke as oet ain mond.
“Ien n gewoon hoes, net as wie?”
“Nee”, zegt moeke “n bisschop woont ien pelaais”.
“Aan t Ozzemaart ien Stad staait t pelaais van bisschop van Noord-Nederland”.
“Dat wil ik zain”, zegt Annebeth.
“Ien Stad”.
“Nee, ien Madrid. Messchain is Sunterkloas wel thoes”.
Mit heur drijent worden ze t der over ains dat ze noar t del Prado museum gonnen, noar grote kathedroal en noar t pelaais van Sunterkloas.
Op schoul vertelt Annebeth dat ze mit pa en moeke noar Mardid gaait ien veurjoarvekaanzie.
Mit t vlaigmesien.
“Als jullie weerom zijn, mag je ervan vertellen”, zegt juf.
As vekaanzie veurbie is, maggen kiender op moandagmörn vertellen wat ze ommaans had hebben of woardat ze noar tou west hebben.
Thoesblievers hebben dikke verhoalen.
Dij ver weg west hebben, waiten sums nait goud meer wat ze zain hebben.
Mor Annebeth wait hail secuur wat ze wel zain het, t pelaais van Sunterkloas.
“En was e der ook?” vroagen kiender.
“Ja, dat zou mooi geweest zijn”, zegt juf, “had je op audiëntie kunnen gaan”.
Zunder te vroagen wat dat is, zegt Annebeth: “Hai was nait thoes”.
Hoofdstuk 12 Op Vekaanzie
Uit: Sunterkloas Grunneger Veurleesverhoalen
Auteur: Klaas Pieterman
Dit item heeft 0 Likes
