Sunterkloas Veurleesverhoalen - Hoofdstuk 10 Swaarte Piet dij deur schosschain tumelde
Pagina afdrukken
Op mörn van 6ten dezember glipte der n Swaarte Piet achter opa aan te boetendeur oet
net dou e mit overjes over t nachtgoud aan noar postbus laip om kraant te hoalen.
Opa zag hom nog net weg schaiten op zied van t hoes laans.
Annebeth mag geern noar opa’s verhoalen lustern.
Mainstied binnen ze te mooi om woar te wezen, kin Annebeth wel noagoan.
Mor dit is toch wel hail biezunder.
“Woar kwam dij Swaarte Piet din vandoan?”
“Bie ons te t hoes oet, dat kin nait aans”.
“Mor hou kwam e doar?”
“k Heb snaachts wel gestommel op t dak heurd, mor k heb der verder gain aandacht aan geven”.
“Wat dochden ie, dat liekt goud? Want as Sunterkloas nait bie joe op t dak komt, mor hai ridt stilletjes joen hoeske veurbie, din heb je aanderdoagsmörns niks ien schouch liggen”, zegt Annebeth.
“Zo is t mor net”.
“t Duurde aal mit aal n mooi zetje”, zegt opa. “ik heb nog even docht dat Sunt-Nikloas mit peerd en aal omdeel kletterde, zoveul lewaai dat t gaf. Mor op n duur heurde ik gonnent weglopen over vorstpannen”.
“k Zol net ien sloap valen, as oma zegt: “Heurs dat wel, dat hinneweer geloop op t dak?”
“Volgens mie binnen ze weer vot”.
“Dou bin we baai ien daipe sloap valen”.
“t Kin nait aans, of dat het t lewaai west van Swaarte Piet dij deur schosstain tumelde”.
Annebeth denkt even noa.
“Hai kon toch wel weer deur schosstain hin omhoog klimmen?”
“Nou”, denkt opa noa, “dat zel nait touvalen, vermoed ik. “Aans zol e dat ja wel doan hebben”.
Annebeth en opa onnaaiern dat Swaarte Piet gewoon ien houk van koamer zitten goan is,
bie cadeaus.
En dat e wacht het tot opa te ber oet kwam en kraant hoalen zol.
Achter opa laans is e noar boeten tou glipt.
Annebeth: “Haar der mor n foto van moakt”.
Hoofdstuk 10 Swaarte Piet dij deur schosschain tumelde
Uit: Sunterkloas Grunneger Veurleesverhoalen
Auteur: Klaas Pieterman
Dit item heeft 0 Likes
