Sunterkloas Veurleesverhoalen - Hoofdstuk 6 Annebeths gruintetoenje

Annebeth het verleden joar n marsepeinen wortel van Sunterkloas kregen.

Nou ze mit moeke bie bakker ien winkel staait, zigt ze net zukkent achter t glaas liggen.

n Oranje wortel, nog mooier as gruinteboer te koop het.

Mor bie gruinteboer zit der n haile bos loof op en hier enkel n luk toefke gruin.

As ze aan beurt binnen, vragt Annebeth aan bakkervraauw: “Woarom leg ie aaltied n wortel tusken ale lekkere dingen?”

“Dij wortel bakt bakker veur Sunterkloas zien peerd’.

Annebeth lustert.

“Hai kon ook vouerbait bakken, mor doar gaait veuls te veul marsepein ien.

Of n mousblad, mor dat is hom te veul gruin. Wat legstoe din bie dien schouch?”

Annebeth kikt verwonderd: “Wat bie schouch?”

“Ins gain napke wotter?’, vragt bakkersvraauw.

Annebeth wait nait wat ze zeggen zel.

“Wie reken mor zo”, zegt bakkersvraauw, “as t peerd haile naacht bie ale deuren laangs mout, zel e toch wel ais n moal honger of dörst kriegen”.

Dat Annebeth dat zulf toch nooit bedochd het.

As ze weer thoes komen, zigt Annebeth heur aine opa mit pa zitten te proaten.

Ze is slim nijsgiereg woardat dij baaident t aaltied over hebben.

Mor nou kin ze t nait opbrengen om te lustern.

“Hallo”, ropt ze.

“Bakkersvraauw zegt dat ze n wortel veur Sunterkloas zien peerd onder schosstain legt, en n koemke wotter. Woarom dounen wie dat nait?”

Pa en opa kieken nkander aan, wel van baaident zo gaauw t goie antwoord het.

Opa.

“Ach”, zegt aine opa, “hail ainvoudeg, ie hebben gain gruintetoen”.

“Dou ik zo old was as doe nou, haren mien pa en moeke n moustoen achter t hoes. Doar verbaauwde mien pa gruinte. En as mien moeke rode kool of aans wat eten wol, hil ze dat te toen oet”.

“En ie hilden doar wat oet veur Sunterkloas zien peerd?” begript Annebeth.

“n Wortel en n blad mous. En vouerbait hilden wie van n boer. Of t bleef der bie”.

Annebeth prakkezaairt.

Op oavend van Sunterkloas zel ze wat veur t peerd bie heur schouch zetten. n Schuddeltje mit lözze hoavermout en n bakje mit wotter. Ze zel gruinteboer vroagen om n wortel.

t Volgend veurjoar wil ze zulf n stukje grond hebben van moekes bloumtoen. Ze wil der mouzen poten, wortels zaaien en n stuk of wat vouderbaiten. Veur ankom joar Sunterkloas.

Hoofdstuk 6 Annebeths gruintetoenje
Uit: Sunterkloas Grunneger Veurleesverhoalen 
Auteur: Klaas Pieterman