Sunterkloas Veurleesverhoalen - Hoofdstuk 5 Bakkers deurtje
Pagina afdrukken
Mor zo op n dag schut t Annebeth weer ien t zin:
‘Sunterkloas op t witte peerd
staait veur bakkers deurtje’.
“Wat is dat veur n deurtje, pa? Ik zai haildal gain lutje deurke bie bakker”.
“Deur liekt klain, omdat Sunterkloas op t peerd zo groot is”.
t Antwoord komt Annebeth goud veur.
Bakker het n deur ien winkel.
n Gewone winkeldeur doar je ien en oet kinnen.
Mor as Sunterkloas veur dij deur staait, boven op t witte peerd, din liekt dat n luk deurke.
Annebeth heur t wel iendenken.
Ien bakkerij zulf zitten haile grote schuurdeuren.
Mor dij zitten aaltied dicht.
As ze grote schuurdeuren open deden, zol Sunterkloas doar kin mit gemak deur hin kinnen, mit peerd en aal.
Mor Annebeth wil heur kop der nait laanger mit schraben.
“Woarom staait e juust bie bakker veur deur? Der binnen toch genogt speulgoudwinkels.”
“Koekjes kopen, volgens t verske”, zegt pa.
“Doe waize ja wel wat sunterkloaskoekjes binnen?”
“En bakker moakt nog meer lekkere dingen”, zegt moeke. “Schoemkes, hartjes van marsepein, sukkergoud, snoupgoud van sukkeloa en banketstoaven”.
“n Letter van banket”, ropt Annebeth, omreden dij kregen opa en oma t veureg joar.
En dij letter van banket komt veur ien t verske ‘O, kom er eens kijken, wat ik in mijn schoentje vind’.
“Opa en oma”, vaalt pa ien, “dij haren vanzulf ook n pa en n moeke”.
“En ook opa’s en oma’s”, zegt Annebeth.
“Dou dij klain wazzen, kwam Sunterkloas dou ook aal bie deuren laangs?”, wil ze waiten.
‘Zeker. Mor kiender kregen dou veuraal praktische dingen, nije sokken of n muts, hansken of n nachtpon. Speulgoudwinkels wazzen der zuver nait. Mor kiender kregen dou ook n grote taai-taaipop of n stoetkeerl of n swoan-ien-t-nust, mit wat schoemkes en peperneuten”.
Annebeth begript woarom dat Sunterkloas bie bakker wezen mos.
En ze wil nou toch ook waiten wat dij grote schuurdeuren te beduden hebben.
“Hail ainvoudeg”, zegt pa.
“Ik wait dat nait meer, mor hail vrouger brochde bakker boeten t dörp brood en stoet noar minsken tou ien zien koetsewoagen. Dij ston achter grote schuurdeuren”.
“Mor din haar bakker ook n peerd”, zegt Annebeth.
“Joa, mor gain witte”.
Hoofdstuk 5 Bakkers deurtje
Uit: Sunterkloas Grunneger Veurleesverhoalen
Auteur: Klaas Pieterman
Dit item heeft 0 Likes
