Sunterkloas Veurleesverhoalen - Hoofdstuk 1 Stoomboot
Pagina afdrukken
“Weer niks ien schouch”, mommelt Annebeth.
Zai is net te bèr oet en kikt vot ien houk van koamer.
Annebeth het aal n dag of wat veur t sloapengoan heur schouch opzet.
Recht onder schosstain.
Bozzem is aal laank vot, Annebeth wait ins nait dat dij der ooit zeten het.
Ien t hoes doar ze woont, hebben ze centroale verwarmen.
As soavends heur schouch noast n radiator zet, mag ze wel Sunterkloasverskes zingen, as ze dat wil.
Mor moeke zingt nait mit. En pa haildal nait.
“Dat dounen wie as t zo wied is”, zeggen ze.
“Mor Sunterkloas is aal laank ien t laand”, zegt Annebeth.
“Woarom dut e mie din nait wat ien schouch?”
“Omdat e snaachts slept”, zegt pa.
“Woardat din?”
“Op stoomboot”.
t Is even stil, Annebeth denkt noa: Woar zol stoomboot bleven wezen?
Ze zaten apmoal veur televizie dou Sunterkloas ien Nederland aankwam.
Moeke en pa wat verder noar achtern, Annebeth dichter bie.
Pa haar n povverd bakt en moeke haar soep kookt.
Ze aten dij dag nait aan toavel, mor mit bord op schoot veur televizie..
“Is stoomboot nog nait weerom noar Spanje tou?”, vragt Annebeth.
“Nee, dat kin nait, hou komen Sunterkloas en Swaarte Piet aans weer thoes?”
“t Schip ligt woaraarns achter-oet ien hoaven”, denkt pa.
En zo zel t wel wezen.
Heur moeke smeert heur n stoetje.
“Flink deur eten mien wicht, t is aal loat”.
Annebeth dut heur best, mor zai krigt der gain sloek op.
t Is ook apmoal zo spannend.
Dij mörn mouten ze ien hal van schoul blieven of ien boeten op t plaain.
As bel gaait, maggen kiender ien t lokoal.
Op heur toaveltje staait n pakje ien Sunterkloaspepier.
“Pak maar uit”, zegt juf, “Sinterklaas is vannacht op school geweest”.
Ien t pakje zit n deuske mit n poar peperneuten, n sukkeloaden kikker en n marsepeinen moes.
Dat Sunterkloas op schoul west het, en nait bie heur thoes, doar denkt Annebeth nait aan.
Zai wil juffraauw aans wat vroagen.
“Woar is stoomboot nou, juf?”
En zo klain as ze is, zigt ze dat juf veur n groot roadsel staait.
Hoofdstuk 1 Stoomboot
Uit: Sunterkloas Grunneger Veurleesverhoalen
Auteur: Klaas Pieterman
Dit item heeft 0 Likes
