Mien knientje

mien knientje kreeg heur jassie uut
zai wupt nooit meer op t gras
en jonkies krigt zai ook nait meer
mien klaaine wildebras
mien knientje kreeg heur jassie uut
heur vreten kin aan kaant
de ontong ligt verdreugd in reup
pa zet heur hok in kraant

mien knientje kreeg heur jassie uut
mien pa het t zulm doan
dat jassie hangt nou aan de lien
mor k loat lekker gain troan
mien knientje kreeg heur jassie uut
mit t steertje der nog aan
mien knientje was al zwoar genogt
moe dut heur zo in paan

mien knientje kreeg heur jassie uut
zai ligt doar haildal bloot
op t aanrecht noast de pot mit zolt
zai is nou haildal dood
mien knientje kreeg heur jassie uut
en ruienent trek ik aan
ik goa nou noar mien oma tou
zai het petat in paan

mien knientje kreeg heur jassie uut
heur vreten kin aan kaant
de ontong ligt verdreugd in reup
pa zet heur hok in kraant

Auteur: Gré van der Veen
Uit: De Siberische Kou (1990)