Op de boerderij

Mörgen:
De hoan (op t dak): “Kukeleku! Uut de veren aalmoal!”
Blavvo de hond (sloaperg): “Woef! Woef! Wat is hier aan de haand?”
De hoan:  “Kiek nait zo dom sloapkop. Moak die vris. Dommee moust aan t waark!”
Blavvo de hond: “Moust nait mainen dast doe hier de boas bist.”
De hoan: “Dat zel k die zain loaten! Doe gaaist die wassen. En den gaaist t laand in om de kou te melken.”
Blavvo de hond: “Woef! Woef! Wat n hondeleven het n boerderijhond. Aarbaiden veur de kost. Woef!” (Hai schudkopt en slentert noar t laand tou)
De hoan: “Zolst gain emmer mitnemen?”
(Blavvo komt weerom en hoalt n emmer tot t schuurtje uut)
De hoan: “Gaaist melk hoalen in dien schier goud?”
Blavvo: “Nee domkop, in dizze emmer!”
Knorro t swien (komt der aanlopen): “Gnorr! Gnorr! Wat heb k nou aan mien fiets hangen? Wat n gebler op de vrouge mörgen!”
De hoan: “Gain meroakels Knorro. Der mout vandoage n beetje gebeuren.”
Knorro (draait in t rond): “O, o, o. k Wor der zenewachteg van.”
De hoan: “Doe gaaist de waske doun, Knorro!”
Viefpoot t schoap (komt der aanlopen): “Wat hest aal te mekkern, ol hoan? Kom ais van t dak òf ast duurfst.”
De hoan: “k Blief hier zitten om joe in de goaten te holden.”
Viefpoot: “Hest doe t sums veur t zeggen?”
De hoan: “Joa. Ik bin vandoag de boas op de boerderij.”
Viefpoot: “k Luuster allent noar Tok de tuut. Zai is n best daaier. Zai zit op d’aaier.”
Maupie de kat (is aan t schounenpoetsen): “Maauw! Maauw!”
De moezen (binnen aan t schovveln): “Piep! Piep!”
De tuten (binnen aan t toenhaarken): “Tok! Tok!”

Oavend:
De hoan: ”Kukeleku! De dag is om. Tied om op ber te goan.”
Blavvo: “Doe domme hoan. n Hoan zegt soavends gain kukeleku. Die bist nait goud bie de kop. Wie zellen die pakken en noar de hoanedokter brengen. Kom daaier, help mit de hoan vangen.”

Aal daaier: 
“Domme hoan, domme hoan, domme hoan,
Wie zellen vot mit die noar dokter goan,
Hai onderzöcht dien lief en ook dien bloud.
Doe domme hoan, bist ja lang nait goud.”

Aal daaier perbaaiern de hoan te pakken te kriegen, mor de hoan runt en vlogt en fladdert.....

Auteur: An Kuiper