Wacht mor

Wacht mor as ik groot bin,
gaai ik nooit weer noar school,
eet ik nooit andievie weer,
gaai nait meer noar tandarts,
want dij dut mie aaltied zeer.

As ik groot bin,
koop ik mie n dikke auto
of misschien,
wèl wait, wel n echte vlaigmesien.
Koop k mie n hail grode hond
en zo’n mooie grieze knien.

As ik groot bin,
koop ik mie ook n kasteel,
mit wel honderd koamers
en n voetbalspel,
zodat k mie nooit meer verveel.

As ik groot bin zel je es wat zain!
k Dou alles wat ik  nou nait mag.
Voetballen mit mien beste boksem en schounen aan.
In lanteernpoal klimmen en sigretje roken
en mien aigen eten koken.

Joa, as ik groot bin,
zellen ie ais wat zain.
Din zegt gainaine meer:
doe bist ja nog veul te klaain.

Auteur: Antje Smit-Hazewinkel