Sunterkloas Veurleesverhoalen - Hoofdstuk 11 Hou Swaarte Piet n boef vong

Pagina afdrukken twitter Hyves

Dat aine joar, schoon dat t aal joaren leden het, verget Swaarte Piet nooit weer.

Opa het oet Swaarte Piet zien aigen mond heurd.

En nou vertelt e t verhoal aan Annebeth.

t Was op n naacht dat t baalkeduuster was..

Swaarte Piet lopt mit Sunterkloas op t witte peerd over hoge, hoge doaken.

Net as ze op t dak binnen van t hoes doar ze wat deur schosstain glieden loaten zellen, glipt der ain achter heur laans t duustern ien.

Gain van baaident dij der wat van vernam.

En gain van baaident konden vermoeden dat n boef was.

As Swaarte Piet noar schosstain lopt, komt e stoef bie n dakroam laans.

“Lang mie ais n schroevedraaier aan, Wilm”, heurt hai ain zachtjes flustern.

Swaarte Piet, dij aaltied n doemstok ien buus het om te meten of t cadeau wel deur schosstain hin kin, drukt man dij hai heurt, zien doemstok ien handen.

“Nee, doe slaif”, zegt stem bie t dakroam wat haarder as eerst, “n schroevedraaier. Of aans n hoamer. Of n dikke spieker”.

Swaarte Piet kikt ien zak mit cadeaus, mor hai wait wel zeker dat der allain mor speulgoud ien zit.

Ien tied bedenkt e dat der wat nait deugt as ain midden ien naacht aan t dakroam zit te vrözzeln.

“Ik bin Wilm nait. Mor wel bistoe?”

“Mit buusmes lukt t mie nait”, heurt Swaarte Piet man zeggen.

Op dat moment bedenkt Swaarte Piet: “t Is n boef”.

Hai drukt Sunterkloas grote jutezak mit speulgoud ien handen en t witte linnen zakje.

Op t zulfde moment rokt boef onroad en let hom vlug bie t dak deel glieden.

Swaarte Piet, dij wend is aan doaken, vlugt mit n hink stap sprong achter hom aan.

Nog eerdat boef bie dakgeut is,gript Swaarte Piet hom bie nekvel.

 

“Wat zel we der mit, Sunterkloas?”, vragt Swaarte Piet.

Sunterkloas trekt strik van witte linnen zak lös.

“Wie geven hom n puutje mit zolt”, want dat zit der ien dij witte linnen zak, “omdat e ondeugend west het”.

“Nee”, ropt boef, “din mout k dat zeker opeten doar ie bie binnen”.

“Wie stoppen hom ien zak”, want dij ligt onder ien witte linnen zak, “en nemen hom mit noar Spaanje”.

“Nee, nee”, ropt boef benaauwd, “ik wil hier blieven”.

“Geef hom din mor wat mit rou veur zien blote gat”, zegt Sunterkloas.

“Nee, nee, nee, nait wat mit rou. Dat dut zeer”, jammert boef.

“Din loat we hom lopen. Hai zel schrik nou wel ien bainen hebben”.

Swaarte Piet drukt hom nog gaauw wat peperneuten ien handen.

En doar runt boef hin, doodsblied.

 

Hoofdstuk 11 Hou Swaarte Piet n boef vong
Uit: Sunterkloas Grunneger Veurleesverhoalen 
Auteur: Klaas Pieterman

sunterkloas.jpg