Sunterkloas Veurleesverhoalen - Hoofdstuk 2 Sunterkloas nemt gain risico

Pagina afdrukken twitter Hyves

“Sunterkloas nemt zeker aaltied n haile bult peperneuten mit?” wil Annebeth geern waiten.

“Zakken vol”, zegt moeke, “nog meer as dat kiender mit nkander opeten”.

Annebeth kikt verwonderd.

Der zel wel ais n peperneut ien t wotter valen, of ien t gras.

En as Swaarte Piet aan t streuden is, zel der ook wel ais n kiend per ongeluk op n peperneut stappen.

Mor t is aans as Annebeth denkt.

’Zie ginds komt de stoomboot’.

“Waize wel wat n stoomboot is?”

“n Boot noatuurlk”.

“Zeker. Mor t is n boot dij veuroet voart op stoom”.

“Op stroom?”

“Nee, op stoom. Net as der sums stoom te striekiesder oet puft. En stoom komt ook oet tuit van wotterkoker as t wotter kookt”.

“En bie stoomboot komt stoom te piep oet zetten?”.

“Nee, dat is rook. Mos pa of opa mor vroagen woarom dat de rook oet piep komt en t schip voart op stoom. Wat ik vertellen wol: veur stoomboten aan wazzen der zaailschepen. Dij hestoe voak genogt zain.

Zaailschepen voarden noa ale oethouken van wereld, oost en west. En as ze van verren weer noar hoes tou vuiren, namen ze onderweegs ien Spanje Sunterkloas en Swaart Piet mit. Appeltjes van oranje en de wereld zakken vol peperneuten”.

Annebeth vuilt wel dat t gehaaim nou onthuld wordt.

Mor ze wil eerst waiten wat appeltjes van oranje binnen.

“Appelsienen”.

“Op zukse holten zaailschepen”, gaait moeke ien ain boksembaand wieder, “dij voak etenswoarenvan ain stee noar aander brochden, aarten en bonen, en ook eten aan boord haren veur t scheepsvolk, doar woonden ook aaltied wel n stuk of wat moezen”.

“En dij vienden peperneuten ook lekkerder as raauwe bonen”.

“Krekt. En appeltjes van oranje kwamen aaltemoal hail over noatuurlk”.

“Mor nou waize ook woaromdat Sunterkloas ale joaren hier zo vro ien t laand is. Vrouger, as t zuver nait waaide, of wiend kwam net oet verkeerde houk, din lag zo’n zaailschip mor zo n dag of wat stil”

Annebeth perbaaiert heur t veur te stellen, midden op zee stilliggen en wachten dat wiend weer waait.

“Sunterkloas nemt gain risico, mos mor reken. Hai stapt begun november op boot”.

“Sunterkloas is n wieze man”, denkt Annebeth.

 

Hoofdstuk 2 Sunterkloas nemt gain risico
Uit: Sunterkloas Grunneger Veurleesverhoalen 
Auteur: Klaas Pieterman

sunterkloas.jpg