De Spin

Pagina afdrukken twitter Hyves

De spin

 

 

woaraargens midden in de polder

doar woont n spin op de zolder

ze trekt n droadje uut heur lief

zo staark as wat en hail slim effectief

 

ze weeft doar zunder zörg en piene

heur staarke web aal uut routine

en schitternd mooi en hail secuur

mor dat verveelt heur op de duur

 

toch spint ze nog mor even deur

n spin dij het ja nait veul keur

in tied staait zai al wel op sprang

want in heur zit de vrumde drang

 

vandoag’ heur leste web te weven

ze dut dat din mit angst en beven

de vroag is, woarom dut ze dat?

om toch! ze is heur spinneleven zat

 

 

ze wil stommegeern n vogel imiteren

mor hou, dat mout ze zok nog leren

zweven maank wolken en op de wind

dij vrijhaid is wat heur meroakel zint

 

- ik kin zo’n vrije vogel hail laif vroagen

zien kennis aan mie over te droagen

dij wait ja alles van zweven en vlaigen

as t nait zo is din zol k ja laigen -

 

de spin klimt via t dakroam op t dak

ze zit doar o zo wies op heur gemak

te wachten op dij vogel uut de lucht

dij zel vast wel komen op zien vlucht

 

de vrije vogel komt en zugt op slag de spin

doar zitten, hai pikt t moaltje vot mor in

zoks lekkers kin n vogel ja nait lopen loaten

en och, dij spin haar toch niks in de goaten

 

 

de spin op de zolder het niks vernomen

van t vraide lot dat heur is overkomen

 

 

gelukkeg zit in t midden van de polder

n spiksplinternije spin op de zolder

ze weeft heur web en…

 

 

Gré van der Veen